Babaye nga Engineer sang NIA 6, Posible nga Ginpatay suno sa SOCO

Iloilo City–Posible nga ginpatay ang supervising engineer sang National Irrigation Administration (NIA) Regional Office 6.

Pagpati ini ni PCINSP Hilarion Roga sang Scene of the Crime Operatives (SOCO) sang nakita ang tinulo sang dugo sa cellphone, computer kag habol ni Engr. Marites Santillana, 40-anyos nga tumandok sang Bacolod City pero naga-board sa Tacas, Jaro. Indi pa makasiguro si Roga kon may pilas si Santillana bangud nagahabok na ang iya lawas. Pero mas maayo suno sa SOCO nga mapa-autopsy ang bangkay agud mabal-an kon may foul play sa kamatayon ni Santillana.

Nasapwan kahapon sang aga si Santillana sang iya landlord sa gina-arkilahan nga kuwarto nga hublas kag nagakulob sa salog. Katapusan ini nakita nga buhi sang nagligad nga Biernes sang gab-i. (Aine Grace Bravo)