Pila ka Local Chief Executives sa Syudad kag Probinsya sang Iloilo, Ginhingadlan ni Pres. Duterte nga mga protektor sang Illegal Drugs
Nalawagan ang pangalan nanday Iloilo City Mayor Jed Patrick Mabilog, Calinog Mayor Alex Centena, Maasin Mayor Mar Malones kag Vice Mayor Francis Amboy, kag Carles Mayor Salagunting Betita nga ginpahayag involved sa illegal drug trade.
Nalakip man ang pangalan ni Hamtic Antique Mayor Julius Ronald Pacificador, former Guimaras Congressman JC Rahman Nava kag former city councilors Tony Pesina kag Erwin Tongtong Plagata.
Namitlangan man si Jeffrey Celiz nga base sa listahan ni Duterte, representative sang Party list sa Panay.
Ginpahayag ni duterte nga ginpa-validate niya ang mga pangalan sa listahan antes ginlawag kaina sang kaagahon sa hamyang sang mga napatay nga soldado sa davao city.
Ginlawag man ni Duterte ang pangalan sang mga judges nga ginalakipan nanday Judge Mupas sang Dasmariñas, Cavite; Judge Reyes sang Baguio City; Judge Savillo sang RTC Brach 13 Iloilo City; Judge Casiple sang Kalibo, Aklan; Judge Rene Gonzales;
Judge Navidad sang RTC Calbayog City kag Judge Exekiel Dagala sang MTC Dapa, Siargao.
“Police Personnel”
Madamo nga police officers halin sa Western Visayas ang nalakip sa listahan ni presidente rodrigo duterte nga ginlawag kaina sang kaagahon.
Lakip sa mga taga-Rehiyon 6 nga ginlawag ni duterte sanday retired General Valerio, General Bernardo Diaz nga anay PRO-6 Director, Supt Floro, Supt Kashmir Disomangcop, Supt Dela Paz, Supt Genepa, Supt Ipil Dueñas, Supt Condag, Supt Eugenio Malic, PNP Personnel Lamsis, Supt Gomboc, Supt Lebin, Chief Inspector Rio Maymay, Chief Inspector Kenneth Militar, Senior Inspector Donasco, Inspector De Jose, Inspector Lino Duarte, kag Inspector Vicente Vicente.
Ginmanduan ni Duterte ang mga pulis nga nalawagan nga magreport kay PNP Chief Director General Ronald Dela Rosa.
“Pinaka-shabulized”
Pinaka-shabulized ang Iloilo suno kay Presidente Duterte sa iya paglawag sang pangalan sang mga judges, pulitiko kag pulis nga ginpahayag involved sa illegal drugs.
Ginbuyagyag ni Duterte nga samtang nagapangampanya pa lang siya sa Iloilo, madamo ang nagpalapit sa iya kag nagpabutyag sang pagka-desperado bangud sa paglapta sang illegal drugs.
Namitlangan man si Jeffrey Celiz nga base sa listahan ni Duterte, representative sang party list sa Panay. (JoMaque)