Joint Patrol kag Checkpoints sang mga Pulis kag Soldado sa Probinsya, May Direktiba Suno kay IPPO Director PSSUPT Roderick Augustus Alba

Iloilo–May direktiba sa Iloilo Police Provincial Office kag mga suldado nga mag-conduct sang joint patrol kag checkpoints sa mga strategic areas sa probinsya.

Ginpahibalo ini ni IPPO Director PSSUPT Roderick Augustus Alba agud indi makibot kag ma-alarma ang mga pumuluyo sa probinsya kun may makita nga mga suldado kag pulis sa checkpoints. Kabahin lang ini suno sa iya sang security measures kasunod sang pagpamomba sa Davao City sang Biernes sang gab-i.

Nagpanawagan man si Alba sa publiko nga mag-aligmat kag i-report gilayon ang makaduluda nga mga tawo ukon grupo kag supetsuso nga mga bagahe nga ginbilin sa mga pampubliko nga lugar.

Gindula ni Alba ang kahangawa sang publiko nga kabahin sang martial law ang ginahimo sang kapulisan kag military  matapos gindeklarar ni Presidente Rodrigo Duterte ang state of lawlessness sa bug-os nga pungsod. Ginapa-alerto lang sang presidente ang mga pulis kag suldado suno sa iya agud indi masulit sa iban nga lugar ang natabu sa syudad sang Davao. (AGB)