(UPDATE) Babaye nga Pasahero Sang Nagsuhot nga Pick-Up Truck sa Naka-Park nga Truck sa Mandurriao Napatay Samtang Ginabulong sa Ospital

Iloilo City- Patay ang 19-anyos nga babaye nga pasahero sang Isuzo D-Max nga naipit sa iya pulungkuan matapos nga nagsuhot ang salakyan sa buli sang naga-park nga truck sa Guzman St., Mandurriao kaina sang kaagahon.

Madugay pa antes nga nakuha sa Regel Besenio sang Hibao-an Norte, Mandurriao kag gindeklarar nga napatay sa Western Visayas Medical Center. Padayon naman nga ginabulong sa pareho nga ospital ang utod ni Regel nga si Rogelio Besenio, 21-anyos, kag iban pa nga sakay sang pick-up nga sanday Argie Peñaflorida kag Joven Huyo. May bukol man ang isa pa ka pasahero nga si Robert Rosales.

Ulihi na lang nakilala ang driver sang pick-up nga si Gian Carlo Cepe, 20-anyos sang Guzman, Mandurriao bangud nagpalagyo ini pagkatapos sang insidente. Suno sa driver sang truck nga si Aurelio Elnar sang Cebu, nakibot siya sang may naglagabong. Nakahazard man suno sa iya ang truck nga may karga nga feeds. Ginkustodiya sang Mandurriao Polcie si Elnar. (AT)