Anay Liga President sa Ajuy, Arestado matapos Nakuhaan sang mga Indi Lisensyado nga Pusil

Ajuy, Iloilo — Dakop ang anay Liga ng mga Barangay president sang Ajuy matapos nakuhaan sang madamo nga pusil kag bala nga wala sang lisensya.

Ginkilala ang suspetsado kay Nolasco Castro, 49-anyos sang Sitio Nabitasan, Barangay Tipacla, Ajuy.

Nakuhaan si Castro sang shotgun, caliber .22 rifle, mga bala sang nagkalain-lain nga sahi sang pusil, magazine sang caliber M16 kag pito ka assorted holster sang pistol kag revolver.

Suno kay Police Chief Inspector Charlie Sustento Jr, hepe sang Ajuy Police Station, ginserbi ang search warrant batuk kay Castro nga pirmado ni Judge Rogelio Amador.

Dugang pa ni Sustento, ginpahayag ni Castro nga may mga pamahog sa iya kabuhi rason nga may mga armas siya.

Preso na sa karsel sang Ajuy Police Station si Castro kag natalana kasuhan. (JoMaque)