Memorandum sa Pag-untat sang Fixed Checkpoints, Nabaton na sang PRO-6 halin sa PNP National Headquarters

Iloilo City–Nakabaton na ang Police Regional Office 6 sang memorandum halin sa PNP National Headquarters nga nagadumili sang pag-conduct sang stationary ukon fixed checkpoints.

Ginkumpirmar ini ni PRO-6 Spokesman PSUPT Gilbert Gorero matapos sang mandu ni Presidente Rodrigo Duterte sang nagligad nga semana. Base sa memo, pasugtan lang ang checkpoint sa hot pursuit operation kag kon kinahanglan bantayan ang entrance ukon exit sang isa ka lugar agud madakup ang suspek ukon mapunggan ang krimen. Bangud sini, mas pabaskugon sang kada police station suno kay Gorero ang presensya sang mga pulis paago sa foot ukon mobile patrol.

May mga bentaha kag disbentaha suno kay Gorero ang pagdula sang fixed checkpoints.

Aminado ini nga nagakadelay ang biyahe sang mga motorista kag nagadala man sang inconvenience ang checkpoints. Pero bentaha suno kay Gorero kon may checkpoint agud nga mapunggan ang krimen. (AGB)