Soldado kag Pulis, Ginpahayag nga Nagtiruhay sa Lapuz!

Iloilo City–Napuhag ang mga residente sa Jalandoni Estate, Lapuz matapos nga may nagpinalupok sang pusil kaina sang kaagahon.

Ginreport nga nagtiruhay sanday PO3 Guiller Alacre nga assigned sa Regional Headquarters Support Group kag Staff Sergeant Felicito Aguirre assigned sa Military Intelligence Group sa Kampo Delgado. Pero ginpanginwala sang asawa sang soldado nga nakapalupok ang iya bana. Suno kay Mrs. Margilyn Aguirre, si PO3 Alacre kag duha sini nga kaupod ang nagpinalupok sang pusil samtang ginahangkat ang iya bana nga magtiruhay.

Wala sang nasamaran sa natabu. Narecover sa lugar ang duha ka empty shells sang 9mm pistol, basiyo sang 45 caliber pistol, basiyo sang m16, basiyo sang 12-gauge shotgun, isa ka deformed slug kag wala naglupok nga bala sang 9mm.

Gina-imbestigaran na sang mga pulis ang insidente samtang ginahulat pa ang sabat ni PO3 Alacre sa akusasyon sang asawa sang soldado. (AGB)