4 ka barangay sa syudad, ginakonsiderar sang ICPO nga indi na apektado sang illegal drugs

Iloilo City–Apat ka mga barangay sa syudad nga ginakonsiderar sang Iloilo City Police Office nga indi na apektado sang illegal nga druga.

Suno kay ICPO Director PSSUPT Remus Zacharias Canieso, apat sa 180 ka barangay sa syudad ang makabig nga ‘un-affected’ na nga ginalakipan sang Sampaguita, Ed Ganzon, Osmeña kag Kauswagan sa City Proper. Hingyuon ni Canieso ang mga miembro sang Barangay Anti-Drug Abuse Council ukon BADAC sang apat ka barangay nga mag-isyu sang resolution nga nagapabutyag nga unaffected na ang ila mga lugar.

Kon wala sang affectation sa illegal drugs ang barangay, nagakahulugan nga wala na diri sang drug users, pushers, drug dens ukon drug tiangge.  Igasumiter sa opisina ni Canieso ang resolution sang BADAC agud i-certify nga indi na apektado sang illegal nga druga.

Apang i-counter check gihapon sang oversite committee sang ICPO suno kay Canieso ang apat ka barangay agud masigurado kun nakalab-ot sa requirements nga unaffected barangays. (AGB)