(UPDATE) Pagpangita kay PDEA-6 identified drug group leader Richard Prevendido, ginatugyan sang iya utod nga si Punong Barangay Remia Gregori sa mga pulis

Iloilo City–Ginpakamaayo ni Bakhaw, Mandurriao Punong Barangay Remia Gregori nga itugyan sa mga pulis ang pagpangita sa iya utod nga si PDEA 6 identified drug group leader Richard Prevendido alyas Buang.

Suno kay Gregori, wala ginsabat sang iya utod ang panawagan nga magsurrender sa mga pulis. Gin-athag man sang punong barangay nga wala siya nakahibalo kon diin ang iya utod kag masobra apat ka tuig na sila nga wala sang komunikasyon.

Nagbalibad na nga maghatag sang dugang nga pahayag si Gregori kag nagrason nga nagalain ang iya pamatyag.

Una na nga ginmandu ni PRO-6 Director PCSUPT Jose Gentiles sa mga pulis nga dakpon si Prevendido nga gin-identify sang Iloilo City Police Office kag PDEA 6 nga high value target drug personality.

May Kaso

Natukiban naman sang Aksyon Radyo Iloilo nga may kaso may kaangtanan sa illegal drugs si Prevendido. Base sa nakuha nga record sang estasyunan halin sa source, may kaso nga illegal possession of dangerous drugs nga may criminal case number 16-79615 si Prevendio. May kaangtanan ini sa pag-raid sa balay ni Prevendido sa Bakhaw, Mandurriao sang Oktubre 21 subong nga tuig.

83.2 ka gramo sang shabu ang nakuha nga ebidensya sa balay ni Prevendido kag posible nga madesisyunan ang kaso sa masunod nga tuig. (AGB)