Balay sang Negosyante sang baboy sa Passi City, ginkawatan

Passi City — Ginabanta sa P600,000 nga cash ang nataban sang mga kawatan nga nagsulod sa balay sang negosyante sang baboy sa Passi City kagab-i.

Sa imbestigasyon sang Passi City Police Station, natukiban sang tag-iya nga si Rolando Palmes, 38-anyos sang B. Casamayor Street Poblacion Ilaya nga guba na ang puwertahan sa likod sang ila balay kag nakuha ang kwarta sa cabinet sang master’s bedroom.

Ginpahayag nga nagkadtu sa namatyan sa isa ka barangay sa Passi City ang pamilya gani wala sang tawo ang ila balay.

May ginasunod na nga lead ang Passi City Police sa insidente kun sin-o ang mga suspect nga nagsulod sa balay sang negosyante.

Nagapati si SPO2 Niel Amador, imbestigador sang Passi City Police Station, nga ginplanuhan sang mga suspect ang pagsulod sa balay.

Posible suno sa iya nga inside job ang insidente bangud nakahibalo ang mga suspect kun diin natago ang kuwarta kag kun ano oras nga wala sang tawo ang balay. (JoMaque)