Transport groups, nagpamahug nga ma-welga kon indi ma-aktuhan sang LTFRB ang ila ginahingyo nga saka sa pamasahe

Iloilo City–Nagpamahug nga magawelga ang mga drivers sang public utility jeepneys (PUJs) kon indi gihapon ma-aktuhan sang Land Transportation Franchising and Regulatory Board (LTFRB) ang ila ginapangayon nga saka sa pamasahe.

Suno kay Iloilo City Loop Alliance of Jeepney Owners and Drivers Association ukon ICLAJODA President Boyet Parcon, wala pa gid na-aktuhan sang LTFRB 6 ang ila ginfile nga petition sang Disyembre 1. Ginaduso sang ICLAJODA nga himuon P7 ang pamasahe sang regular nga mga pasahero sa syudad. Nagapamigado ang mga drivers suno kay Parcon bangud nagalab-ut na sa 30 pesos ang litro sang krudo.

Ginareklamo man sang mga operators ang pagpa-renew sang franchise nga ginapa-agi sa abogado gani nagabayad sila sang P5,000 nga attorney’s fee.

Magapakigsapol si Parcon sa iban nga transport groups sa Enero 7 agud hambalan ang ginaplano nga transport holiday kag rally sa atubang sang LTFRB 6 office sa Barangay Tacas, Jaro. (AGB)