Carles Mayor Seigfred Betita, Nagkonfirmar nga may Nagtawag sa iya nga nagpakilala nga si Presidential Spokesperson Ernesto Abella

Municipality of Carles – Ginkonfirmar ni Carles Mayor Seigfred Betita nga may nagtawag sa iya nga nagpakilala nga si Presidential Spokesperson Ernesto Abella.

Ginsaysay ni Betita nga una nga nagtawag ang caller sa tactical operation sang Iloilo Police Provincial Office kag ginpangayo kay IPPO Director Harold Tuzon sang numero nila nanday Mayor Mar Malones sang Maasin kag Mayor Alex Centena sang Calinog nga nalakip sa narco list ni presidente rodrigo Duterte.

Suno kay Betita, nagduda na si Senior Supt Tuzon sa caller gani ginlaygayan siya nga magpanilag kag ipabalo gilayon sa iya ang na-istoryahan.

Nagpromisa suno kay Betita ang caller nga kakason ang iya pangalan sa narco list. Pero nakibot ang alkalde sang nagpangayo ang caller sang tatlo ka botelya sang blue label nga ilimnon para suno sa iya sa birthday ni Communications Secretary Martin Andanar.

Gilayon  nga ginpabalo ni betita si Tuzon kag gin-block man ang cellphone number agud indi na makatawag sa iya. Halos pareho gid suno kay Betita ang tingog sang caller kay Secretary Abella pero mas bataun.

Gin-inform na ni Tuzon si PRO-6 Director Jose Gentiles sa modus.

(Aljohn Torreta)