58 ka establishments sa Region 6, nag-regularize na sang ila mga empleyado

Iloilo City–Nagalab-ut sa 58 ka establisemento sa Rehiyon 6 ang nag-regularize na sang 1, 086 ka mga empleyado nila tubtob Enero 28.

Ini base sa record sang Department of Labor and Employment ukon DOLE 6. Suno kay DOLE Regional Director Salome Siaton, ginavalidate nila ang mga kompaniya kun nagasunod sa kasuguan nga dapat ma-regularize ang empleyado kun nakalab-ut na sa anum ka bulan ang iya pagtrabaho.

May yara suno kay Siaton nga boluntaryo nag-regularize sa ila mga empleyado pero may yara man nga naghimo sini matapos may nagreklamo.

May joint assessment man nga ginhimo ang mga labor laws compliance officers kag nagabisita sa mga kompaniya agud mag-usisa kun nagasunod ang mga ini sa working arrangement. Dire nakita nga may naga-hire sang short term basis lang.

Ang pag-renew-renew sang kontrata sang mga empleyado suno kay Siaton amo ang gusto nga tapuson sang gobyerno bangud nagaserbe ini nga pamahog sa ila nga security of tenure. (AGB)