Duha ka call center agents, gin-abduct sa parking lot sang mall kag gindala sa Northern Iloilo; 2 sa 3 ka suspek nadakpan!

Iloilo–Nakaluwas sa ginpahayag abduction ang babaye kag lalaki nga call center agents halin sa car park sang mall sa Diversion Road, Mandurriao pasado alas-8 kagab-i.

Base sa imbestigasyon sang mga pulis, gindala sanday alyas Princess kag alyas Mark sa Banate. Suno kay PO3 Nelios Anico sang Barotac Viejo Police Station, nagbakal sang tubig kag condom ang isa sa mga suspek kag nakakita sang tiempo si alyas Princess nga maglumpat paguwa sa salakyan gani nakapangayo sang bulig sa mga residente kag mga pulis. Nagpalagyo naman ang salakyan dala si alyas Mark apang nakapangayo na sang back-up ang Banate police sa iban nga police stations.

Na-intercept ang salakyan sa Barotac Viejo kag naluwas si alyas Mark. Nadakpan naman si Sirius Gim Villareal, 22-anyos sang Tisoy Village, Barangay 7, Tigbauan, nga amo ang gintudlo nga nagadrive sang salakyan. Nadakpan kaina sang kaagahon ang isa pa ka suspek nga si Raymond Cordero, 22-anyos sang Barangay Amamaros, Pototan. Samtang ginapangita pa ang isa ka suspek nga ginpahayag nagpanaug sa Zarraga.

Natukiban nga may kaso nga rape si Villareal gani ginsaylo na siya sa Tigbauan Police Station. Si Villareal gintudlo man nga naghimulos sa ginang sang Abril 29, 2015 kag sa isa pa ka babaye sang Mayo 5, 2015. (AGB)