Pasahero sang taxi, nabuklan sa aksidente sa City Proper

Iloilo City–Nabuklan ang pasahero sang taxi matapos nagbunggo ang salakyan sa service sang Commission on Population sa intersection sang Delgado kag Jalandoni Streets, City Proper kaina sang udto.

Madasig nga nagresponder ang ICER team kag ginbulong si Siony Mondragon sang San Joaquin antes gindala sa ospital. Luwas naman ang duha pa ka pasahero lakip ang 92-anyos nga babaye nga himata ni Mondragon.

Suno sa taxi driver nga si Boyet Lauresta, nagbalikid lang siya sang makadali sang may naglagpok sa likod gani wala niya natalupangdan ang nagapondo nga salakyan sa iya atubang. (AGB)