Lalaki, ginbuno patay sang iya abyan sa Maasin!

Maasin, Iloilo — Ginpabutyag ni Gilbert Portillo,55-anyos sang Brgy. Layog, Maasin nga wala siya nakabalo nga nabuno-patay niya ang abyan nga si Rey Ann Siasat,29-anyos sang Barangay Dacdacanan, San Joaquin kaina sang kaagahun.

Ini ang base sa pahayag ni Police Inspector Menrico Candaliza, hepe sang Maasin Police Station.  Dugang ni Candaliza, namiesta si Siasat upod ang live-in partner sa Sitio Nagato, Barangay Bolo, Maasin kahapon.

Ginpahayag nga nagtambong sila sa binayle sang gab-e kag sang nagpauli na, naghingyo ang suspetsado nga mag-angkas sa ila motorsiklo. Nakibot ang mag live-in partner suno kay Candaliza sang hinali lang nga ginbuno ni Portillo si Siasat.

Gindala pa sa ospital ang biktima nga may pilas sa tuo nga parte sang iya lawas apang napatay. Hinubog ang gintunaan sang insidente suno kay Candaliza. Preso sa Maasin Municipal Police Station ang suspetsado. (JoMaque)