Inmate sa BJMP-Pototan nga gintudlo involved sa illegal drug operation sa guwa sang presuhan, ginhingadlan na!

Iloilo–Ginhingadlan na ang inmate sa Iloilo District Jail sa Pototan nga ginapadalagan sang Bureau of Jail Management and Penology ang inmate nga ginatudlo involved sa illegal drug operations sa guwa sang presuhan.

Suno kay PSSUPT Christopher Tambungan, Deputy Director for Operations sang Police Regional Office 6, ginkilala ang inmate kay Ken Mark Pineda sang Infante, Molo nga nadakpan sa buy bust operation sang Setyembre, 2016. Posible suno kay Tambungan nga luyag mag-establisar si Pineda sang iya pangalan ukon grupo sa transaksyon sang illegal drugs.

Naguwa ang pangalan ni Pineda sa tactical interrogation sa mga babaye nga nadakpan sa buy bust operation sang Domingo. Gintudlo sang mga babaye ang inmate nga amo ang nagahatag sa ila sang signal agud magkuha sang drug supply sa Manila kag i-distribute sa Iloilo kag Capiz. (AGB)