Councilor Joshua Alim, nagaplano mag-file sang reklamo batuk sa PECO sa ERC

Iloilo City — Nagaplano si Councilor Joshua Alim nga magfile sang complaint sa Energy Regulatory Commission batuk sa Panay Electric Company.

Gintumod ni Alim nga rason ang ginpahayag nga mga violations sang PECO sa Magna Carta. Lakip sa mga ginlapas sang PECO suno sa konsehal ang pagbutang sang kuntador sa kataason nga lapaw sa tatlo ka metro, tingub nga pagdeliver sang bill kag pagpalampas sang 24 ka oras antes ibalik ang gin-utod nga linya sang kuryente sang konsumedor nga nagbayad sa unpaid bill.

Wala nauyunan ni Alim ang pag-isnab sang PECO sa public hearing sang committee on public utilities sang city council may kaangtanan sa ginrequest ni Mayor Jed Patrick Mabilog nga imbestigasyon bangud sa mga reklamo sang mga konsumedor pareho sang over billing.

Suno sa PECO, indi proper forum ang city council agud magsabat sila sang mga reklamo batuk sa ila kundi ang ERC. Bangud sini, napaminsaran ni Alim nga magfile sang resolution ukon complaint sa ERC samtang nagahulat nga madayon ang congressional inquiry. (JoMaque)