Pulis sa Jaro nga ginreklamo sang balo nga nagpa-oral sex kag namahog nga plantedan sang shabu, i-subject sa summary dismissal proceeding

Iloilo City — (UPDATE) Ipa-subject sa summary dismissal proceeding si PO1 Marken Canillo, ang pulis nga ginreklamo sang 32 anyos nga balo sa jaro nga nagpilit sa iya nga mag-oral sex diri.

Suno kay Police Regional Office 6 Deputy Regional Director for Operations Christopher Tambungan, ginahulat niya ang investigation report batuk kay Canillo. Ginsulit ni Tambungan nga wala sang lugar sa Philippine National Police ang mga nagahimo sang iya gintawag nga kababuyan agud maguba ang imahen sang organisasyon.

Ginpa-athag ni Tambungan nga gina-background check ang tanan nga miembro sang drug enforcement teams.  Wala lang siya nakahibalo kon paano gin-background check sang Intelligence section sang Iloilo City Police Office si Canillo nga assigned sa Drug Enforcement Team sang Jaro Police Station.

“Indi magpa-areglo”

Indi magpa-areglo ang 32 anyos nga balo sa Jaro nga nagreklamo nga ginpwersa sang pulis nga mag-oral sex sa iya.

Suno kay alyas Inday, napreparar na ang judicial affidavit niya agud mapasakaan sang kaso administratibo si PO1 Marken Canillo assigned sa jaro police station pero ginsaylo na sa Iloilo City Public Safety Company. Gamiton ni Inday nga ebidensya ang panyo nga ginpahayag gingamit ni canillo sa pagpahid sa iya kinatawo matapos ang ginpahimo sa complainant. Ginturn-over ni Inday ang panyo sa Women and Children Protection Desk sang Jaro Police Station kag ginpadala na sa PNP Crime Laboratory agud ma-examine.

Ginsaysay ni Inday nga hunyo 2 sang nagsulod sa ila balay si Canillo, gindala siya sa iya kwarto kag ginpwersa nga mag-oral sex sa pulis. Suno pa kay Inday, ginpahug siya ni Canillo nga plantedan sang shabu ukon mapareho sa iya bana nga ginpatay kon indi pagsundon ang iya ginapahimo.(JoMaque)