Toyota Grandia, gin-carnap sang mga nagpakilala nga NPA; tatlo ka suspek, wala nadakpan

Iloilo–Narecover sa Oton ang Toyota Grandia nga gin-carnap sang nagpakilala mga miembro sang New People’s Army sa Brgy. San Antonio, San Miguel kaina sang aga.

Suno kay PINSP Francis Albert Fortunado, hepe sang San Miguel Police Station, nagpangayo sang bulig ang driver nga si Charles Paca-oncis, 39-anyos sang Palje, San Enrique matapos nga gin-carnap sang tatlo ka wala makilal-an nga mga lalaki ang salakyan.

Nagtransaksyon ang nagpakilala “Maam Grace” sa tagdumalahan sang tourist transport kahapon suno kay Fortunado kag nagpahayag nga mapasugat sa San Antonio, San Miguel. Pero wala nagapati si Fortunado nga NPA ang mga suspetsado.

‘Person of interest’

Ginakabig naman person of interest ang driver nga nagpatigayon sang transaction. Posible suno kay Fortunado nga kilala ni certain Danny ang tatlo ka suspetsado.

Si Danny suno kay Paca-oncis ang naghatag sang iya numero kay certain “Maam Grace” nga mapasugat sa iya sa  Brgy. San Antonio, San Miguel kag mapadul-ong sa Kalibo. (AGB)