Robbery, ginasunod nga anggulo sa pagbuno patay sa 63-anyos nga babaye sa Tigbauan

Iloilo — (UPDATE) Robbery ang ginasunod nga anggulo sang Tigbauan police sa pagbuno patay sa 63-anyos nga babaye sa Barangay Parara Sur sang weekend. Base sa report sang pulis, P100 lang ang nakuha sang wala nakilala nga suspetsado nga madasig nagpalagyo matapos ginbuno si Baldomera Duga. Napilasan sa dughang kag tiyan si Duga samtang ang adopted sini nga si Mary Joy Cabuguas, 24-anyos, napilasan sa tuo nga tuhod kag wala nga butkon. Gindala pa sa ospital si Duga apang napatay. Ginpahayag ni Cabuguas nga makilala niya ang suspetsado kun makita niya liwat. Narecover sang scene of the crime operatives (SOCO) ang sweat shirt nga may tinulo sang dugo kag ginapatihan ginapanag-iyahan sang suspetsado. Ginlaragway ni Cabuguas ang suspetsado nga singkit ang mata, may kataason nga 5’9 tubtub 5’10 kag ginabanta naga-edad sang 27 tubtub 29 anyos. (JoMaque)