Chief sang Sara District Hospital, handa mag-atubang sa imbestigasyon sang provincial government sa pagbalibad sang driver sang ambulansya nga magdul-ong sang indigent nga pasyente sa syudad

Sara, Iloilo–Handa nga mag-atubang sa imbestigasyon sang Iloilo Provincial Government ang chief sang Sara District Hospital may kaangtanan sa pagbalibad sang driver sang ambulansya nga magdul-ong sang pasyente sa ospital sa syudad.

Gin-athag ni Dr. Jeremia Obaniana nga gin-admit sa Sara District Hospital sang Hulyo 17 ang lima ka tuig nga pasyente bangud sang kidney problem.  Apang sang Hulyo 18, nagdesisyon ang pamilya sang pasyente nga masaylo sa ospital sa syudad sang Iloilo kag nagpamangkot kun pila ang bayad kun magpadul-ong sa ambulansya.

Suno kay Obaniana, ginbasehan niya sa pagsabat ang tarifa nga P1, 800. Ang problema lang suno sa iya, wala naghingyo ang pamilya nga buligan sila kag wala man nagpangayo sang referral nga masaylo sa ospital sa syudad. Nagdiretso lang suno kay Obaniana ang pamilya nga magsakay sa Ceres.

Dugang ni Obaniana, indi pa kuntani inug-discharge sa ospital ang pasyente apang nag-ayo na ang pamilya nga maguwa bisan duha pa lang ka adlaw nga na-confine sa ospital ang bata. (AGB)