“Free legal service”

Iloilo City–Magahatag sang libre nga serbisyo legal ang mga abogado nga miembro sang Integrated Bar of the Philippines (IBP)-Iloilo Chapter kadungan sang ika-80 nga Charter Day Celebration sang syudad.

Natalana ang libre nga legal service sa Agosto 19, halin alas-10 sa aga tubtob alas-2 sa hapon, sa Activity Center sang Robinson’s Place Iloilo sa Ledesma Street, City Proper. Inisyatibo ini suno kay IBP-Iloilo Chapter President Leo Sombiro kasunod sang imbitasyon ni City Legal Officer Lorna Laurea nga makahatag sang serbisyo sa pigado nga mga pumuluyo. Pa-athag ni Atty. Sombiro, kabahin sang ila social corporate responsibility ang paghatag sang libre nga serbisyo legal.

Plano man  i-implementar sang liderato ni Sombiro ang pagtukod sang clinic sa Iloilo Hall of Justice kag pagbutang sang Speaker’s Bureau para sa mga katapo sang media agud makapa-athag sang mga isyu sa publiko. (AGB)