IPPO, naglunsar sang fund raising activity para ibulig sa legal battle sang gindismiss nga si PCI Charlie Sustento

Iloilo — Naglunsar sang fund raising activity ang iloilo police provincial office ukon IPPO agud makatipon sang pondo nga puwede ibulig sa legal battle ni Chief Inspector Charlie Sustento, ang gindismiss nga hepe sang Ajuy Police Station kag supervisor sang Provincial Drug Enforcement Unit kag Provincial Special Operations Team 3. Ang “Isang Libo para kay Sustento” suno kay Tayaba, nagasakop sang tanan nga police sa idalum sang IPPO. Ang dismissal kay Sustento nag-ugat sa ginpasaka nga kaso nanday Richard Samontosa kag Janice Braga sang Dumangas batok kay Sustento kag sa kaupod nga mga pulis nga sanday PO3 Ramon Baylon, Jr, PO2 Joebert Detorio kag PO1 John Domzon. Sa reklamo nanday Samontosa kag Braga, ginpahayag nga sang Nobyembre 24, 2014 sang gab-i, gin-imbitar sila ni Sustento nga na-assign sadto sa Dumangas MPS, nga magkadto sa police station may kaangtanan sa nadula nga motorsiklo. Sang nagpamalibad si Samontosa, ginpahayag nga ginsinggitan siya ni Sustento kag ginsumbag. Gintayaan man siya pusil sang upod nga police ni Sustento. Ginpahayag sang Ombudsman nga guilty ang 4 ka police sa kaso nga grave misconduct kag conduct unbecoming of a police officer nga ginpasaka nanday Samontosa kag Braga. (JoMaque)