PCI Jovie Espenido, gin-assign ni PDuterte sa Iloilo

Gin-assign ni Presidente Rodrigo Duterte si Ozamiz City Police Head PCINSP Jovie Espenido sa Iloilo. Ginhambal ini ni Duterte sa selebrasyon sang National Heroes Day sa Libingan ng mga Bayani kaina sang aga.

Ginpamangkot pa ni Duterte si Espenido kun mabuhi si Mayor Jed Patrick Mabilog kun i-assign ini sa Iloilo bangud duha na ka mayor ang napatay sa duha ka lugar kun sa diin na-assign ang police official. Matandaan nga sang gin-assign si Espenido sa Albuera, Leyte, napatay sa ginpahayag shootout si Mayor Rolando Espinosa samtang yara ini sa sulod sang prisuhan. Suno nga assignment ni Espenido ang Ozamiz City sa diin napatay sa drug operation si Mayor Rolando Parojinog, iya asawa kag mga himata.

“Welcome”

Gina-abi-abi naman ni Mayor Mabilog ang pag-assign kay Espenido sa Iloilo. Sa text message sang alkalde sa media, ginpabutyag sini nga sigurado nga makabulig si Espenido sa anti-illegal drug operations bisan wala pa nabal-an kon sa syudad ukon sa probinsya siya i-assign.

Ginpabutyag pa ni Mabilog nga makabulig ang experyensya ni Espenido sa pagpakig-away batuk sa illegal nga druga sa iban nga lugar agud mapa-untat ang problema sa Iloilo. (AGB)