Cong. Jerry Treñas, nanginwala nga siya ang nagaduhol sang sala nga impormasyon kay Presidente Rodrigo Duterte batuk kay Mayor Jed Patrick Mabilog

Iloilo City–Ginpanghiwala ni lone district of Iloilo City Congressman Jerry Treñas ang akusasyon ni Councilor Plaridel Nava nga siya ang nagaduhol sang sala nga impormasyon kay Presidente Rodrigo Duterte agud pakalainon si Mayor Jed Patrick Mabilog.

Suno sa kongresista, malapit lang siya kay House Speaker Pantaleon Alvarez bangud naka-updanay sila sadtu sa kolehiyo. Apang indi matuod nga ginapakalain niya si Mabilog. Sa pagkamatuod, siya pa ang nagtinguha sadtu nga ma-imbitar si Mabilog sa mass oath taking sang mga local officials sa Iloilo Convention Center.        Gintinguhaan niya man nga mapasulod sa PDP Laban ang alkalde bangud magkaupod sila sadtu sa partido.

Ginapanindugan ni Treñas nga wala sila sang away ni Mabilog kag nakahibalo ang alkalde nga suportado niya ini.

Suno pa sa kongresista, wala man siya sang rason ukon motibo agud pakalainon ang alkalde. Nagalaum si Treñas nga madula na ang issue kay Mabilog kag sa syudad para sa kaayuhan sang tanan. (AGB)