Asod-Asod nga attempted abductions sa mga bata sa syudad kag probinsya, makaalarma — ICPO Director Henry Biñas

Iloilo City — Alarming ang asod-asod nga insidente sang ginpahayag pagtuyo pagpasakay sa mga kabataan sa van sa syudad kag probinsya sang Iloilo.  Ini ang reaksyon ni Iloilo City Police Office Director SSUPT Henry Biñas kasunod sang case conference sang mga chiefs of police kag imbestigador sang ICPO tuhoy sa insidente kahapon. Gin-ako ni Biñas nga mabudlay masolbar ang nasambit nga kaso apang nagpasalig nga tutukan agud mabal-an ang motibo kag madakpan ang mga suspetsado. Nagapati si Biñas nga taga-Iloilo man ang mga suspetsado. Suno kay Binas, 3 ka insidente sang pagtuyo pagpasakay sa mga bata ang narecord sa Lapaz, 2 sa city proper kag 1 sa Jaro. Dugang niya, may duha ka insidente nga nareport sa syudad apang wala napa-blotter. Matandaan, may kasubong man nga insidente nga narecord sa Tigbauan kag Concepcion, Iloilo.

Composite sketch

Natalana himuan sang composite sketch ang mga suspetsado sa asod-asod nga insidente sang tuyo pagpasulod sa mga kabataan sa salakyan sa syudad kag probinsya.  Suno kay  Biñas, ikumparar ang description sang mga suspetsado sa separado nga mga insidente agud mabal-an kun may similarity ukon ka-anggid ang mga suspetsado.  Gina-verify na man ang plate numbers sang mga salakyan nga ginpahayag gingamit sa insidente suno kay Biñas. May duha ka gina-imbestigaran nga salakyan nga narehistro sa Land Transportation Office suno kay Biñas apang sa Luzon. Gina-imbestigaran sang pulis kun sin-o na ang possessor ukon nakakapot sang natungdan nga mga salakyan suno kay Biñas. Ginpahayag man ni Biñas nga masubmit sila sang report sa city government tuhoy sa mga CCTV sa syudad bangud kalabanan ang wala naga-function ukon guba. (JoMaque)