Councilor Plaridel Nava, nagbuyagyag sang ginpasuni anomaliya sa ginpanghatag nga native chickens sang syudad

Iloilo City–Ginbuyagyag ni Councilor Plaridel Nava nga may anomaliya sa pagpanagtag sang City government sang mga native chickens sa mga benipisaryo sang Pantawid Pamilyang Pilipino Program ukon 4Ps.

Gin-claim sang konsehal nga naglab-ot sa 10 milyones pesos ang pondo sa pagpanagtag sang 17, 500 ka mga manok.  Apang sa purchase order sang City Agriculture Office naglab-ot sa P3, 453, 750 ang pondo para sa mga manok nga ipanagtag sa 3, 500  ka recipients sang 4Ps.

Ang problema suno kay Nava nga nabutang sa kontrata nga tag-300 grams ang kabug-aton sang manok nga ipanagtag apang indi palareho ang sizes nga ginhatag bangud may yara sang piso nga medyo magulang lang sa balot ang ginpanagtag sang city government. Lima ka mga manok ang ginapanagtag sa kada benipisaryo nga ginalakipan sang apat ka munga kag isa ka sulog.

Wala naman gindayon ni Nava ang privilege speech sa gintumod niya nga anomaliya bangud nagakahangawa siya nga itudlo nga supplier sang manok. (AGB/JV)