Councilor Ely Estante, plano pa-imbestigaran ang pagpanghatag sang City Agriculture Office sang native nga manok sa mga 4Ps beneficiaries sang syudad

Iloilo City — Plano ni Councilor Ely Estante nga pa-imbestigaran sa city council ang ginadudahan nga anomaliya sa pagpanghatag sang City Agriculture Office sang native chickens sa 4Ps beneficiaries sa syudad. Daku nga palamangkutanon suno kay Estante ang P198.50 nga presyo sang kada pisu nga ginhatag kag kuwestyunable kon naglab-ut gid man sa 300 grams ang kabug-aton sang manok nga ginpanghatag base sa purchase order.

Plano ni Estante nga magdeliver sang privilege speech sa regular session sang konseho sa Martes agud engganyuhon ang iya mga kaupod nga suportahan ang iya iduso nga resolution para sa imbestigasyon sa isyu. Una na nga nagreklamo ang pila ka benepisaryo bangud daw inumol lang sang bata ka daku ang ginhatag sa ila sang supplier nga Foodwealth Agrovit Trading kag napatay pa ang iban. (JoMaque)