5 Sa 6 Ka Mga Miembro Sang 61st IB Sang Philippine Army Nga Napilasan Sang Naglupok Ang Improvised Explosive Device Sa Janiuay, Nakaguwa Na Sa Ospital
Municipality of Janiuay – Nakagguwa na sa ospital ang 5 sa 6 ka mga miyembro sang 61st Infantry Battalion sang Philippine Army nga napilasan sang naglupok ang improvised explosive device sa Barangay Pangilihan, Janiuay kagab-i.
Ginconfine naman sa Western Visayas Medical Center si Corporal Ronald Peligro, 34, sang Bohol nga naigo sang shrapnel sa guya. Si Corporal Peligro ang driver sang una sa tatlo ka truck nga ginsakyan sang mga suldado nga naghalin sa Barangay Anhawan kag pabalik na sa town proper sang gin-ambush sang New Peoples Army ukon NPA.
Ginpahayag ni Senior Inspector John Paul Guay, hepe sang Janiuay Municipal Police Station nga ginpakabit sa puno sang kahoy ang IED kag gintiming ang pagpalupok sa paglabay sang mga truck sang army.
Magluwas kay Cpl. Peligro, nakaagum sang menor nga kapilasan sanday PFC Joebert Porras, 26, sang Barangay Lonoy, Calinog; Cpl. Remo Londo Villa, 36, sang Mambusao, Capiz; PFC Peter Calugas, 24, sang Tagsing, Leon; Sgt. William Biado Jr, 39, sang Midsayap, North Cotabato kag PFC Ariel Ea, 24, sang Sultan Kudarat.
Indi makumpirmar ni Guay kun may napilasan sa bahin sang NPA.
(ATT)