Committee Of The Whole Sang City Council May Nakita Nga Iregularidad Sa Pagdeliver Sang Mga Pisu Nga Ginpanghatag Sa Mga 4Ps Beneficiaries Sa Syudad

Iloilo City – May nakita nga iregularidad ang Committee of the Whole sang City Council sa pagdeliver sang mga pisu para sa mga 4Ps beneficiaries nga ginpondohan sang National Anti-Poverty Commission nga ginpa-agi sa City Agriculture Office.

Pahayag ini ni Councilor Ely Estante nga chairman sang komitiba sa pagsugod nila imbestigar sa ginpahayag mga anomaliya sa proyekto. Suno kay Estante, wala nasunod ang terms of reference nga ideliver ang mga pisu sa designated distribution center nga amo ang General Services Office.  Sa baylo, gindiretso na sa mga distrito ang delivery.

Natukiban nga gin-assume lang sang inspection team nga nakalab-ut sa 300 grams ang bug-at sang kada pisu gani nila gin-check. Wala man na-certify sang City Veterinary Office nga handa na ipanghatag ang mga pisu.

Ginkwestyun ni Estante bisan ang pagpili sang mga benepisaryo bangud pila sa ila ang wala sang lugar agud magsagud sang mga pisu. Ang kada benepisaryo makabaton dapat sang apat ka munga kag isa ka sulog nga pisu.

(ATT)