(UPDATE) Pagkadakup kay Master Pedic Balume, kadalag-an sang mga pulis kag mga taga-5th District–IPPO Director
Iloilo–Daku nga kadalag-an sang mga pulis kag mga pumuluyo sa 5th District sang Iloilo ang pagkadakup sa ginhingadlan sang Police Regional Office 6 nga drug group leader nga si Arturo Balume alyas Master Pedic sang Sara.
Suno kay Iloilo Police Provincial Office Director PSSUPT Marlon Tayaba, nakita nila ang mga connections ni Master Pedic kag sang iya bata nga si Arturo Balume II alyas Turing nga nadakpan man sa Poblacion, Hinoba-an, Negros Occidental kahapon sang hapon. Suno kay Tayaba, si Balume II na ang nagapalakat sang illegal nga negosyo sang iya amay nga nagabalitan. Nagpa-andam naman si Tayaba nga nakilala na nila ang mga kagrupo ni Master Pedic.
Sa interogasyon kay Master Pedic, gin-ako sini suno kay Tayaba nga nangin bodyguard siya nanday Estancia Mayor Rene Cordero kag former Sara Mayor Neptali Salcedo. Handa ang IPPO mag-imbestigar sa ginpaguwa nga impormasyon ni Balume kon kinahanglan.
Si Master Pedic kag iya bata ang may warrant of arrest sa kaso nga double murder may kaangtanan sa pagpatay sa duha ka supporters ni mayoralty candidate Melina Requinto sang Estancia antes ang eleksyon sang nagligad nga tuig. (AGB)