Acting Mayor Joe Espinosa III May Poder Sa Pagsupervise Sa Pulis Suno Sa NAPOLCOM VI

Iloilo City –  May poder si acting Mayor Joe Espinosa III sa pagsupervise sang Iloilo City Police Office.

Pa-athag ini ni National Police Commission 6 Technical Division Head Napoleon Arostique matapos nga mahimo na ni Espinosa ang function sang isa ka alkalde. Ini bangud naglapaw na sa 30 ka adlaw ang iya pagpungko nga acting mayor kasunod sang sick leave ni Mayor Jed Patrick Mabilog.

Suno kay Arostique, mahimo nga mamanduan ni Espinosa ang mga pulis sa ICPO ilabe na sa pagtapna sang kriminalidad.

Apang ginpa-athag sang NAPOLCOM nga kon magbalik si Mabilog, bawion naman ang otoridad sang local chief executive sa police. Ini bangud nga ginkuha kay Mabilog ang control kag supervision sa police sang ginhingadlan ni Presidente Rodrigo Duterte nga drug protector.

(att)