OIC sang Western Visayas Sanitarium, nag-sorry sa mga naapektuhan sa internal conflict sang ospital

Iloilo — Nagsorry si Dr. Gary Ong, OIC sang Western Visayas Sanitarium sa Sta. Barbara, sa mga personnel nga na-apektuhan sang ginpahayag nga internal conflict sa ospital.   Subong nga semana mabaton sang may plantilla positions ang ila sweldo sang Setyembre samtang 382 pa ka job hires ang wala naswelduhan. Suno kay Ong, ginapangitaan na sang paagi agud maswelduhan ang mga job hires matapos nagbutang si DOH 6 Director Marlyn Convocar sang OIC accountant kag OIC sa Hospital Operations and Patient Support Service sa Western Visayas Sanitarium. Nagpaguwa sang mandu si Convocar agud may magtal-us temporaryo kay Mr. Conrado Sorongon Jr nga ginpapanaugan sang preventive suspension sang 90 ka adlaw epektibu Oktubre 9 subong nga tuig.

Ginapanindugan naman ni Sorongon nga naserbehan na sini ang iya suspension sang 2014 kag sa pagkamatuod, ginterminate pa siya kag sang 2015 lang gin-reinstate gani padayon siya sa pagduty. Sa pagpati ni Sorongon, na-lift na ang suspension order base sa mandu ni anay hospital administrator Rene Feman Autajay sang Oktubre 1, 2015. Nabutang sa Hospital Order nga  ginlift ang preventive suspension kay Sorongon samtang wala pa sang formal investigation sa ginfile batuk sa iya nga grave misconduct, neglect in the performance of duty kag acts prejudicial to the best interest of the service. (JoMaque)