Lulubngan sang mga beterano sa Igbaras, ginreklamo sang concerned citizen nga napabay-an

Igbaras, Iloilo–Ginreklamo sang concerned citizen ang lulubngan sang mga beterano sa Igbaras nga ginpahayag ginapabay-an.

Suno sa tagreklamo nga si alyas Rey, daw maguba na ang Campo Santo sa sulod sang patyo kag bisan sin-o na lang ang ginalubong sa lugar.

Ginpa-athag naman ni Igbaras Mayor Vicente Escorpion Jr. nga ang mga himata sang mga beterano ang nagadumala sang amu nga lugar. Gin-ako ni Escorpion nga nagalingin man ang iya ulo bangud indi lang ang mga beterano ang nalubong kundi bisan ang pila sa ila mga pamilya.

Base sa Resolution nga ginpapanaug sang Sangguniang Bayan sang Igbaras sadtong 90’s suno kay Escorpion, ang mga beterano kag ila asawa lang ang mahimo ilubong sa ginabanta 500 square meters nga kalaparon sang lulubngan.

Nagpasalig si Escorpion nga mapapanaug sang bag-o nga resolution agud hatagan bug-at nga para lang sa mga beterano ang amu nga lulubngan. Nagpasalig man si Escorpion nga ipakay-o ang Campo Santo sa amu nga patyo. (AGB)