(UPDATE) Mga nasunugan sa Jaro kag City Proper, ginhatagan lang sang isa ka semana nga magtinir sa evacuation center

Iloilo City—Isa lang ka semana ang ginhatag sa mga nasunugan sa Barangay Benedicto, Jaro kag Zamora-Melliza, City Proper para magtinir sa evacuation center kag mahatagan sang kinahanglanon pareho sang pagkaun.

Suno kay City Social Welfare and Development Office (CSWDO) Head Gene Garingalao, may financial assistance man nga P5,000 para sa totally gutted ang balay kag P2,500 para sa partially-damaged. Mahimo man makadugang sang bulig ang barangay kon madeklarar nga state of emergency.

Sa official data sang CSWDO, 66 ka balay ang naabo kag apat ang partially-damaged sa Benedicto, Jaro samtang pito ka balay ang totally gutted kag anum ang partially-damaged sa Zamora-Melliza, City Proper. (AGB)