Councilor Ely Estante Nag-athag Sa Position Paper Nga Ginsumiter Sang Pito Ka Konsehal Lakip Niya Sa House Committee on Legislative Franchises May Kaangtanan Sa Petition For Renewal Sang Franchise Sang PECO

Iloilo City – Wala naglaum si Councilor Ely Estante nga hatagan attention sa House Committee on Legislative Franchises ang position paper nga ginpirmahan nila nga pito ka konsehal may kaangtanan sa ila panindugan sa isyu sa renewal sang franchise sang Panay Electric Company.

Suno kay Estante, si Councilor Ed Peñaredondo ang nagdraft sang position paper nga nagahingyo sa komtiba nga naga-deliberate sang petition for renewal of franchise sang PECO nga talakayon ang bill nga wala sang ginapaboran. Samtang si Councilor Liezl Salazar ang nag-email sang position paper kay Congressman Xavier Jesus Romualdo, ang sponsor sang House Bill 6023.

Gin-athag ni Estante nga tuyo lang sang ila position paper ang balanse kag patas nga pagdala sa isyu. Nagpirma sa nasambit nga position paper sanday Councilors Estante, Peñaredondo, Salazar, Jay Treñas, Reyland Hervias,  Love Baronda kag Mandrie Malabor.

Una na nga ginpabutyag ni Councilor Joshua Alim nga nakibot sila ni Councilor Plaridel Nava sang ginpresentar sa public hearing sang Nobyembre 22 ang position paper sang pito ka konsehal magluwas pa sa ila ginhimo kag sa ginsumiter ni Councilor R. Leone Gerochi. Wala suno kay Alim na-istoryahan sa ila session ang position paper.

(ATT)