1 ka police patay, 10 ka iban pa napilasan sa engkuwentro sang RMFB kag suspected NPA members sa Maasin

Maasin, Iloilo — Isa ka pulis ang patay, 10 ka kaupod sini ang pilason sa engkwentro batuk sa ginapatihan mga miembro sang New People’s Army (NPA) sa Sitio Camansi, Barangay Bolo, Maasin mga alas-6:30 kagab-i.

Ginkilala ang napatay kay PO1 Joefel Odon nga dead-on-arrival sa Ramon Tabiana District Hospital sa Cabatuan bangud sang pilas sa ulo. Gindala sa West Visayas State University Medical Center sanday PO1 Rolando Lozada, 30-anyos sang Iloilo City nga may pilas sa kamot; PO1 April Rey Ansag nga may pilas sa magtimbang nga paa; PO1 Kim Iver Cornel, 28-anyos sang Bago City, Negros Occidental; kag PO1 Mark Paul Banquillo, 29-anyos sang Mangil, Janiuay nga may pilas sa kilid. Ginabulong naman sa Western Visayas Medical Center sanday Inspector Melvin Dulce, 26-anyos; PO1 Belvy Bachiller, 26-anyos sang Roxas City, Capiz; PO1 Vincent Yasay, 29-anyos sang Atabay, San Jose, Antique; PO1 Nory Talento, 28-anyos sang Bago City, Negros Occidental kag PO1 Keith Delejero, 35-anyos sang San Enrique, Negros Occidental. Pilason man si PO2 Jose Manuel Bana-ay, 35-anyos.

Sa panaysayon sang gunner nga si PO1 Marlon Arbues, nagasunod sila sa Hilux patrol pabalik sa banwa sang nabatian ang duha ka sigabong sang ginapatihan improvised explosive devise sa likod sang truck nga ila ginasakyan. Nakabalos ang mga pulis tubtob nga nagpalagyo ang ila kaaway. Naglawig suno kay Arbues sang masobra isa ka minuto ang engkwentro. Lunsay mga miembro sang Mobile Force Battalion ukon anay Regional Public Safety Battalion ang napatay kag mga nasamaran. (JoMaque)