Installation ni Monsignor Maurillo Silva sa St. Anne Parish, indi madayon

Iloilo City — Indi madayon ang installation ni Monsignor Maurillo Silva bilang bag-o nga kura paruko sang Saint Anne Parish sa Molo buwas, Nobyembre 29.  Suno kay Silva nga halin sa Pavia Parish Church, ginpabalo siya ni Father Joenick Territorio, Episcopal Vicar sang Jaro Archdiocese, nga palampuwason lang ang petsa sang installation kag hulaton ang effectivity sang reshuffling sang mga pari sa Disyembre 3. Gin-athag ni Silva nga nagatuman man lang siya sang mandu ni Jaro Archbishop Angel Lagdameo nga naga-assign sa iya sa Molo.  Naghingyo naman si Silva sa mga parokyano sang pangamuyo kag paghangup agud masolbar ang isyu sa Saint Anne Parish Church. Ini bangud wala pa naghalin si Father Esperion “Boy” Celis bangud ginahulat pa ang desisyon sang Roma sa iya sulat nga ipabilin lang siya sa Molo. Suno kay Celis, ginahingyo siya sang iya parishioners nga indi sila pagbayaan. (JoMaque)