Lalaki nga nagalakat sa Smallville Complex sa Mandurriao, gintiro patay

Iloilo City —  Patay ang lalaki matapos gintiro samtang nagalakat sa Smallville Complex, Mandurriao kaina sang kaagahun.  Suno kay Chief Inspector Juvy Navales, hepe sang Mandurriao Police Station, ginkilala ang biktima kay Rey Myr Tan, 24-anyos sang Brgy. Balantang, Jaro.  Gindala pa sa ospital si Tan apang napatay bangud sang pilas sa ulo. Nadakpan naman ang suspetsado nga ginkilala kay Vanlen Jyro Joseph Hulleza, 22-anyos sang Brgy. Sambag, Jaro.  May nakita nga tinulo sang dugo sa salakyan ni Hulleza suno kay Navales kag nagtuyo man siya nga magpalagyo sang gindakop. Magluwas kay Hulleza, arestado man ang duha niya ka tinawo matapos ginpahayag nagpamalabag sang gindakop ang suspetsado. Pasakaan sang obstruction of justice sanday Marben Ferrer, 28-anyos, sang Brgy. Sambag, Jaro kag Med-Reach Luable, 25-anyos sang Brgy. Gines, Janiuay suno kay Navales.  Nakilala ang suspect paagi sa mga witness kag sa CCTV footage nga nakuha sa lugar. Padayon pa ang imbestigasyon sang Mandurriao Police sa motibo sa krimen.  Nagpamalibad nga magpa-interview ang pamilya sang biktima kag ang suspetsado. (JoMaque)