Jaro Archdiocese, nag-athag nga nagapabilin nga pari si Father Esperidion “Boy” Celis bisan wala na siya sang parokya

Iloilo City —  Nagapabilin nga pari sang archdiocese sang Jaro si Father Esperidion “Boy” Celis.  Ini ang pahayag ni Father Joenick Territorio, Episcoval Vicar for Chancery Affairs sang archdiocese, bisan may instruction ang Congregation for the Clergy sa Roma nga bakantehon ni Celis ang St. Anne Parish sa Molo. Suno kay Territorio, wala ginkakas kay Celis ang iya pagka-pari apang indi na siya makafunction bilang kura paroko sang St. Anne Parish samtang wala pa sang final decision ang Roma sa iya appeal nga magpabilin sa nasambit nga parokya.

Base man sa instruction sang Roma, nagbutang ang Jaro Archdiocese sang parish administrators sa St. Anne Parish kag sa St. Anthony de Padua Parish sa Barotac Nuevo, ang bag-o kuntani nga assignment ni Father Celis. Ginpahamtang nga parish administrator sa Molo si Monsignor Maurillo Silva samtang si Father Juan Fareñas nga kura paroko sang Dumangas Parish ang administrator sa Barotac Nuevo. Wala naman sang ideya si Father Territorio kon diin plano ni Father Celis nga magtenir matapos nagbiya sa Molo Church. (JoMaque)