One-strike policy, ipatuman sang PNP kon may kaso sang indiscriminate firing sa Christmas kag New Year celebrations

Iloilo City–Ipatuman ni PNP Chief Director General Ronald dela Rosa ang one-strike policy sa mga station commanders, city kag provincial directors angut sa indiscriminate firing sa Christmas kag New Year celebrations.

Base sa memorandum sang PNP chief nga ginpadala sa tanan nga police regional offices, kun may matabu nga indiscriminate firing sa nasakupan sang police station kag kun may maigo sang stray bullet, dapat ini nga solbaron sang chief-of-police sa sulod sang 24 ka oras.

Suno kay Police Regional Office 6 Spokesman PSUPT Gilbert Gorero, mahimu nga makakas ang hepe kag imbestigaran sa kaso administratibo kon mapaslawan siya nga masolbar ang problema sa sulod sang isa ka adlaw.

Kon masobra sa duha ka police stations ang maka-record nga may biktima sang stray bullets nga indi masolbar sa sulod sang 24 oras, iga-relieve ang mga chiefs-of-police kag provincial director ukon city director. (AGB)