Tag-iya sang videokehan sa San Miguel, nabiktima sang accidental firing

San Miguel, Iloilo–Na-ospital ang babaye nga tag-iya sang videokehan sa Sta. Cruz, San Miguel nga naigo sang naglupok ang pusil sang ila customer nga gin-agaw sang bana sang biktima.

May pilas sa tuo nga kamot si Lanie Arroza, 31-anyos sang Rizal Street, Oton. Nadakpan sa follow-up operation si Danilo Compuesto, 55-anyos sang Sta. Cruz, San Miguel, kag nakuha sa iya ang homemade 12-gauge shotgun.

Suno kay PO3 Billy Salvilla, imbestigador sang San Miguel Police Station, nagbaisay ang suspek kag bana sang biktima nga si Ruel Arroza bangud sa kulang nga sinsilyo. Ginpahayag nga nagpauli si Compuesto kag nagkuha sang pusil kag nagbalik sa videokehan. Nag-agaway sang pusil ang suspek ang bana sang biktima tubtob nga naglupok kag naigo ang babaye. (AGB)