Pagbutang sang bike lane sa pila ka dalanon sa syudad, practical suno kay Councilor Jay Treñas

Iloilo City — Practical ang pagbutang sang bike lane sa pila ka dalanon sa syudad. Pahayag ini ni Councilor Jose Efrain Treñas bisan pa may nagareklamo nga pila ka sektor bangud ginpahayag nga wala nakonsulta antes ginpinta ang bike lane sa Delgado, Mabini, General Luna kag Infante.  Suno kag Treñas, gina-engganyo sang tikang ang alternatibo nga tranportasyon kag daku man ang mabulig agud mabuhinan ang air pollution. Nagapati ang konsehal nga kon maplastar sang maayo, makabulig ang bike lane agud indi maglala ang problema sa trapiko bangud ma-engganyo ang iban nga magbisikleta.

Plano ni Treñas nga magbalay sang ordinansa agud maregulate ang pagamit sang bike lane kag mapuslan imbes nga mangin perwisyo. Magapakigsapol ang konsehal buwas kay Mayor Joe Espinosa upod sa mga opisyal sang DPWH kag bicycle associations agud istoryahan ang proyekto. (JoMaque)