Pag-appoint sang bag-o nga board of directors sang MIWD, ginapatun-an pa ni Mayor Joe Espinosa sa City Legal Office

Iloilo City — Wala nadayon ang pag-appoint ni Mayor Joe Espinosa sang bag-o nga board of directors sang Metro Iloilo Water District bangud ginapatun-an pa sini sa City Legal Office. Paathag ni Espinosa, bilang abogado, dapat mangin preparado siya bangud sang posible masandukot nga legal battle. Hulaton sang alkalde ang rekomendasyon sang City Legal Office antes ang paghimo sang masunod nga tikang. Maga-appoint si Espinosa sang bag-o nga set of officers nga magabulos sa MIWD board bangud illegal kag void suno sa iya ang pagpungko sang board of directors matapos nagpaguwa ang Korte Suprema sang desisyon sa kaso sang Cebu Metropolitan Water District nga nagadeklarar nga unconstituional ang portion sang Presidential Decree 198 nga nagatumod sa appointing authority.

Handa sa atubangon nga kaso

Handa si Mayor Joe Espinosa III nga mag-atubang kon pasakaan sang kaso sa tiun nga mag-appoint siya sang bag-o nga Board of Directors sang Metro Iloilo Water District ukon MIWD.  Gin-athag ni Espinosa nga ginasunod niya lang ang ruling sang Korte Suprema sa kaso sang Cebu Metropolitan Water District nga nagdeklarar nga unconstitutional ang probisyon sang laye sa appointing authority kag ginbalik sa mayor sang Cebu City ang otoridad sa pag-appoint sang mga miembro sang Board sang water district. Suno kay Espinosa, indi niya kontra ang mga nagapungko subong nga Board sang MIWD apang dapat nga sundon ang mandu sang korte.

Ginapanindugan sang MIWD nga indi magsunod sa ginpadala ni Espinosa nga cease and desist notice bangud wala suno sa ila sang poder ang alkalde sa pagpa-untat sang ila trabaho.  (JoMaque)