Tatlo ka barangay sa syudad, gindeklarar nga drug-cleared

Iloilo City–Masarangan nga madeklarar nga drug-cleared ang mga barangay sa syudad kon mangin seryoso kag may kooperasyon sa tanan nga sektor.

Ini ang pahayag ni Mayor Jose “Joe” Espinosa III kasunod sang pagpresentar sang Certificate of Drug-Cleared Barangay sa Barangay Luna kag Santa Isabel sa Jaro kag Sampaguita, City Proper. Plano ni Espinosa nga pabaskugon pa ang ikasarang sang mga barangay tanod kag barangay officials agud mapabilin nga hilway sa illegal nga druga ang mga barangay.

Walo ka barangay sa syudad ang ginduso nga ideklarar nga drug-cleared apang wala nakapasar sa talaksan ang Kauswagan, Ed Ganzon, Osmeña kag San Jose sa City Proper kag Banuyao sa Lapaz.

Ang Certificate of Drug-Cleared Barangay pirmado sang mga miembro sang Regional Oversight Committee on Barangay Drug Clearing Operation nga sanday DILG 6 Director Atty. Anthony Nuyda, DOH 6 Director Marlyn Convocar, PRO 6 Director PCSUPT Cesar Hawthorne Binag kag PDEA 6 Director Wardley Getalla. (AGB)