Apat ka outpost sang police nga ibutang sa Smallville-Boardwalk area, malapit na lang mahuman

Iloilo City–Malapit na lang mahuman ang apat ka police outpost nga ginapa-obra sang Smallville-Boardwalk Business Association Incorporated.

Pahayag ini ni Mr. Jim Velez nga presidente sang asosasyon. Suno kay Velez, posible matapos ang outpost subong nga semana. Ipahamtang ang mga outpost sa strategic areas kag butangan sang blinkers agud mahapos matultulan sang mga nagapangita sang bulig.

Nadesisyunan ang pagpabutang sang outposts sa meeting sang mga establishment owners, barangay kag city officials kag police kasunod sang mga kinagamo sa Smallville Complex. Magluwas sa mga pulis, maga-augment man sa outpost ang mga barangay tanod sang San Rafael, Mandurriao. (AGB)