Lalaki Ginlampusan Helmet Sang Ka-Live In Sadto Sang Iya Nobya Samtang Nagapasulod Sila Sa Lodhing House Sa Lapaz

District of Lapaz – Nagreklamo sa Lapaz Police Station ang 22-anyos nga call center agent nga ginlampusan sang helmet sa ulo samtang nagapasulod sa lodging house sa Lapaz.

Ginkonfirmar ni Senior Inspector Rey Sumagaysay, hepe sang Lapaz Police Station, nga nagreklamo si alyas Boy Number 2 nga gulpi ginlampusan ni alyas Boy Number 1, nagatrabaho nga singer kag electrician, kag ginpahug nga patyon. Kaupod ni Boy Number 2 ang iya nobya nga si alyas Inday, 22-anyos nga call center agent man, sang natabu ang insidente. Nagreklamo man ang driver sang taxi nga ginsakyan sang duha bangud nayupok ang pang-ulihi sang iya unit pero nagpa-areglo kay Boy Number 1.

Base sa pagpangusisa sang Lapaz police, live-in partner ni Boy Number 1 si alyas Inday kag may ara sila siyam ka bulan nga bata. Nakita sini si Inday upod kay Boy Number 2 sa Gaisano City gani iya ginsundan tubtob sa lodging house. Nagrason naman si alyas Inday nga ginasakit siya ni Boy Number 1 kag pigado ang ila pangabuhi rason nga nagpangita siya sang trabaho.

Gin-ako ni Boy Number 1 nga ginprangka siya ni Inday mabulagay sila pero wala man nagpa-athag sang rason. Sa police station lang nabal-an ni Boy Number 2 nga may live-in partner ang iya nobya. Nalugpayan naman ini kag wala na ginpapreso si Boy Number 1. Ginpahayag nga nag-upod si Inday kay Boy Number 2 sang naguwa sila sa police station.

(ATT)