Mayor Joe Espinosa Nagpadala Sang Sulat Sa City Council Nga Nagahingyo Sang Imbestigasyon Sa 12.3-B Peso Agreement Sa Tunga Sang MIWD Kag Metropac Water Investments Corporation

Iloilo City – Ginpadal-an ni Mayor Joe Espinosa sang sulat ang City Council nga nagahingyo nga imbestigaran ang 12.3 billion peso contract sang Metro Iloilo Water District sa MetrPac Water Investments Corporation.

Luyag ni Espinosa nga patun-an sa konseho ang mangin epekto sang kontrata kag ginhingyo nga maghimo sang ordinansa agud maproteksyunan ang mga konsumedor. Una na ginpahayag ni Espinosa nga gusto niya pa-imbestigaran kon nag-agi sa ensakto nga proseso ang pagsulod sang MIWD sa joint venture agreement bangud wala siya nakahibalo tuhoy diri.

Nagreact ang pila ka konsehal sa sulat ni Espinosa. Para kanday Councilors Joshua Alim kag Plaridel Nava, wala sang control kag supervision ang City Council sa operasyon sang water district gani indi sila maka-imbestigar. Tun-an ni Alim ang kaundan sang sulat kon mabaton na.

Ginpahayag naman ni Councilor Ely Estante nga nakadepende kay Councilor R. Leone Gerochi kon pwede imbestigaran ang MIWD. Indi pa makahatag sang komento sanday Councilors Reyland Hervias kag Mandrie Malabor bangud wala pa nila nabaton ang sulat sang alkalde. Wala pa man sang komento sanday Councilors Lizel Salazar, Jay Treñas, Candice Tupas kag Love Baronda.