Tagdumalahan sang Guimbal District Hospital, nagpaathag sa pagkamatay sang nagbun-ag nga iloy sa ospital bangud sa ginpahayag mishandling

Guimbal, Iloilo — Nanindugan si Dr. Alberto Cordero, chief sang Rep. Pedro Trona Memorial District Hospital sa Guimbal, nga ginhimo nila ang tanan agud matatap sang maayo ang 23-anyos nga iloy nga nagbata sa ospital.  Ang pasyente nga si alyas Jennyvive sang Oton ang ginpahayag napatay bangud sang mishandling sa ospital suno sa pamilya. Suno kay Dr. Cordero, nagbleeding si alyas Jennyvive rason ginrefer nila sa Western Visayas Medical Center. Ang WVMC ang may kapasidad sa pag-atender sa medical needs sang pasyente suno kay Dr. Cordero.

Ginpa-athag naman ni Dr. Cordero nga protocol sang ospital ang pagmuno sa himata sang pasyente may kaangtanan sa ila billing kun i-transfer sa iban nga ospital apang kon emergency ang kaso, mahimo nga indi lang anay ini pagbayaran.  Dugang niya, wala man sila nagapabayad sang Php 500 sa himata para sa ambulansiya kun i-transfer ang ila pasyente nga may emergency case sa iban nga ospital.

Una na ginpahayag ni Mrs. Oliva, iloy ni Jennyvive nga ginapabayaran sa iya ang ila billing, nagamit nga units sang dugo sa pagbata kag Php 500 para sa ambulansiya antes magtransfer sa WVMC. Nagpasalig si Dr. Cordero nga imbestigaran niya ang mga alegasyon ni Mrs. Oliva. Ginpanginwala naman ni Dr. Cordero ang pahayag ni Mrs. Oliva nga nagpahayag sa iya si certain Dr. Castillo nga tubtob lang 5:00 P.M. ang iya duty rason dapat itransfer sa iban nga ospital. May mandate ang mga doktor suno kay Dr. Cordero nga atendiron ang ila pasyente kun kinahanglan wala sapayan lampas na sa ila duty hours.
Natalana istoryahun sang tagdumalahan ang pamilya sang natungdan para mapa-athagan.  Nagpasalig naman si Dr. Cordero nga ginahimo nila ang tanan agud maserbisyuhan sang maayo ang ila mga pasyente. (JoMaque)